Кара-Корјы не келген?
Кара албаты билер бе?
Кӧдӱрерге бисти келген бе?
Кӧмӧргӧ бисти јӱрген бе?
«Башчызы јок јон калды» – деп,
«Бажы јок јурт калды» – деп,
Путин оны ийген бе?
«Алтайы олордыҥ байлык» – деп,
«Албатызы олордыҥ кийик» – деп,
Баш билинип келген бе?
Кара-Корјы келерде,
Кару Алтайыс кайкатты.
Кайран балдар туристтеп,
Кар кӧчкӧгӧ алдыртты.
Канча кӱнге јут болуп,
Камык суулар јаанады.
Јылу јайдыҥ келери
Канча ӧйгӧ удады.
Катуурканган Алтайыс
Кандый белге ийет не?
Камдарыс бистиҥ аайлаар ба?
Јарлыктарыс јартаар ба?
Ламаларыс билер бе?
Одус јылдыҥ туркунына
Оҥду, јакшы јатпадыс,
Ӱч талдашты ӧткӱрип,
Бойыстаҥ Башчы тутпадыс.
Бердников деген шилемир
Он ӱч јылга базынды.
«Акыр, мыны токтодок» – деп
Айдар кижи чыкпады.
Арт-учында амтажыйла,
Алды-ӱстиле азырады.
Канчыкка, койго тӱҥдейле,
Каткырып туруп, салеерди.
Ордына келген кижини
Оҥдоорго бӱгӱн кӱч эмтир:
Бердниковтоҥ јамыны
Садып алган кижи бе?
Башкарарга келген бе?
Базынарга јӱрген бе???
Ӧстӧпкӧ Еришев
